U scrùsciu de’ pinseri

 

 

 

Cu l’occhi ammenzu u niru sbalancati, 

 

nto scuru ca si po’ tagghiari a feddi,

 

comu surgiva d’acqui arriminati,

 

trabuccunu ricordi tristi e beddi,

 

 

 

U scrùsciu silinziusu de’ pinseri,

 

mi teni svìgghiu nta sti notti scuri,

 

e a l’orru di strachiummi e di pitreri;

 

aspettu du matinu lu chiaruri.

 

 

 

Abballunu chiù furmi vacabunni,

 

antichi…da lu tempu svisciurati,

 

lu ventu i ‘cchiana e scinni comu l’unni;

 

a usu fogghi giarni e sdisiccati.

 

 

 

Bluccati nta ddu munnu ammavaratu,

 

mi rìdunu ancora ammizzigghiati,

 

sippuru vapurusi e nturcigghiati;

 

ci vidu ancora chiaru lu passatu.

 

 

 

È ‘n vastuneddu ccà e ddà pirciatu,

 

ca mi susteni nta la caminata,

 

vagghiardu, comu fussi appena natu;

 

e m’accumpagna ancora pa me strata.

 

 

 

E mi susteni quannu ntra la queti, 

 

lu vecchiu libru vogghiu scaminari,

 

‘ccussì liggennu ‘a menti s’arrisedi:

 

m’aiuta li sturturi a supirari.

 

 

 

Mi pigghia pi la manu la Rialtà,

 

e mi ricorda i màculi e l’affanni,

 

ca ogni omu a la nicissità;

 

discerni i cosi boni da li nganni.

 

 

 

Mi dici cu’ la santa virità,

 

mentri lu chiaru in luntananza appari

 

e ogni furma squàgghia e scumpari:

 

“Na vota passa u Tempu e si nni và!”

 

 

 

 

 

 

 

              Calura

 

 

 

Aspettu ca ciatia anticchia j ventu

 

a l’umbra misu accantu a stu varcuni,

 

lu mari non fa nuddu muvimentu;

 

è fermu comu ‘n granni gibbiuni.

 

 

 

Traspari cristallinu lu funnali

 

fra scogghi varianti di culuri,

 

…e u ciauru…u ciauru m’assali:

 

nni sentu ntra li nari lu so oduri.

 

 

 

Lu suli a picu sutta a ‘n celu azzolu

 

abbrucia tutta para la marina,

 

aipuni aggiuccati nta lu molu

 

sunnàcchiunu nta l’aria calurina.    

 

 

 

Li varchi tutti nfila sistimati

 

annàcunu li cianchi siddiusi

 

vulìssiru sintiri li sfirzati

 

nta prua quannu tàgghiunu i marusi.

 

 

 

È ferma d’ogni arvulu la fogghia,

 

‘a genti è ammucciata nta friscura

 

e grapi a vanidduzza ogni sògghia;

 

‘spittannu lu ristoru quannu scura.

 

 

 

Paiseddu ca t’abbrazzi cu’ lu mari,

 

li casi vasci chini di culuri,

 

li to stratuzzi sunnu sulitari

 

nna stu mumentu caricu d’arsuri.

 

 

 

Ma quannu u ventu torna a scuncicari

 

sbaràgghia chista cutra di caluri,

 

allura t’accuminci a ‘rrusbigghiari…

 

e jù l’aspettu chinu di suduri!

 

 

 

 

 

 

 

     Unni sunnu li me' nanni?

 

 

 

Zittìsciunu l’ariddi e cacanziti,

 

o scrùsciu de me passi a stu violu,

 

fra li cucuddi sicchi…ciaramiti… 

 

e aceddi chi passannu vannu nvolu.

 

 

 

La casa vidu accostu o canaluni:

 

lu cèusu…umbrusu vardianu,

 

lu puzzu cu la corda a pinnuluni;

 

ma ‘a cùrrula e lu quatu già arruggianu.

 

 

 

Ntravidu vecchi nòzzula j cirasa,

 

satari fra i canali di lu tettu,   

 

ca u ventu a so piaciri accùcchia e spasa;

 

muvènnuli senza nuddu pruggettu.

 

 

 

Grapii la porta…e ntra lu chiaru e scuru:

 

na ‘n chiovu vitti accantu u fucularu,

 

‘a citulena appisa nta lu muru;

 

e arrassu…nta l’agnuni c’è ‘n panaru.

 

 

 

La vucca di lu furnu pari agghiutti        

 

ancora li ducizzi du passatu,

 

assissi nto casciuni ‘a nica vutti;

 

mi vardu attornu…nenti è canciatu.

 

 

 

Ma Iddi…unni sunnu li me nanni?

 

Ddi facci assai bunari e risulenti,

 

e siddu chi firriu a tutti banni…

 

è comu siddu fussiru prisenti!

 

 

 

Attrovu immaculati chiddi affetti

 

ca svìgghia mi tineru ‘a fantasia,

 

…ma la spicchera ormai chiù non rifletti…

 

cu tìnni chistu locu in alligria.